მოქალაქეთა უსაფრთხოებისთვის სტიქიის პრევენციის ღონისძიებები ხორციელდება

მოქალაქეთა უსაფრთხოებისთვის სტიქიის პრევენციის ღონისძიებები ხორციელდება

დარიალის ხეობაში, მცხეთა-სტეფანწმინდა-ლარსის საავტომობილო  გზაზე, სტიქიური მოვლენების შედეგების სალიკვიდაციო სამუშაო გრძელდება. დამკვეთი საავტომობილო გზების დეპარტამენტია და პროექტი სახელმწიფო ბიუჯეტიდან ფინანსდება. რეგიონული განვითარებისა და ინფრასტრუქტურის მინისტრი ზურაბ ალავიძე სამუშაო პროცესს სახელმწიფო სამშენებლო კომპანიის დირექტორთან, გიორგი შენგელიასთან ერთად, ადგილზე გაეცნო.  
პროექტის სრული საკონტრაქტო ღირებულება 3 მილიონ ლარამდეა, ამ დროისთვის ადგილზე 15 ადამიანია დასაქმებული.  სამუშაოს დასრულების შემდეგ, მდინარე თერგი მეწყრული ჩამონაშალისგან გაიწმენდება, რაც წყლის დაგუბების პრობლემას მოხსნის, ხეობაში გვირაბის მშენებლობის დაწყების შემდეგ კი საერთაშორისო მნიშვნელობის გზაზე ტრანსპორტი შეუფერხებლად გადაადგილდება.
სტიქიური მოვლენებისას პრევენციის ღონისძიებების ფარგლებში,   საევაკუაციო დერეფნის მშენებლობა ლარსის საბაჟო-გამშვებ პუნქტ “ყაზბეგზე“ გასულ წელს დასრულდა. უპრეცედენტო პროექტი მნიშვნელოვანია იმით, რომ რთულ რელიეფში, მეწყრების, წყალდიდობებისა და სხვა ბუნებრივი კატაკლიზმების შემთხვევაში, უზრუნველყოფს მცხეთა-სტეფანწმინდა-ლარსის საერთაშორისო მნიშვნელობის საავტომობილო გზით მოსარგებლე ადამიანების, საბაჟო-გამშვები პუნქტისა და არსებულ მშენებლობებზე მომუშავეთა უსაფრთხო გადაადგილებას სტიქიის ზონიდან ევაკუაციის ადგილამდე.